Манайд худалдаалагдаж байгаа эмийг улсын бүртгэлд заавал бүртгүүлсэн байх ёстой байдаг ба бүртгэхдээ эмийн чанар аюулгүй байдлын баталгааг хангах чиглэлээр эрүүл мэндийн тусламж үйлчилгээний хэрэгцээнд нийцүүлэн эмчилгээний өндөр идэвхтэй, чанартай аюулгүй эмийг бүртгэдэг байна. Гэтэл энэ бүртгэлийн загвараас зөрүүтэй  эмүүд худалдаанд гарч байгааг Мэргэжлийн Хяналтын илрүүлсэн бөгөөд иргэдийг сонор сэрэмжтэй байхыг анхаарууллаа. Тухайлбал, Польш Улсын Польфарма эмийн үйлдвэрт үйлдвэрлэсэн Диакарб (ацетазоламид) 250мг шахмал эм нь эмийн бүртгэлд бүртгэгдсэн байна. Уушги-зүрхний дутмагшлаас шалтгаалсан хаван, нүдний глауком /нүдний дотоод даралт ихсэх/ өвчин, шээс хөөх зорилгоор болон эпилепси /уналт, таталт/ -ийн үед хэрэглэдэг энэ эмийг эмийн сангууд жороор олгох ёстой.  Гэтэл энэ эмийг ОХУ-ын “Акрихин” эмийн үйлдвэрт савласан гэсэн хаягтай, бүртгэлийн загвараас зөрүүтэйгээр зах зээлд худалдаалж байгааг илрүүлжээ.