Манай оронд худалдаалагдаж буй Польшийн Польфарма эмийн үйлдвэрт үйлдвэрлэсэн Диакарб (ацетазоламид) 250мг шахмал эм нь бүртгэлийн загвараас зөрүүтэй байгаа тул авч хэрэглэхгүй байхыг мэргэжилтнүүд анхаарууллаа. Тодруулбал  уушги, зүрхний дутмагшлаас шалтгаалсан хаван, нүдний глауком /нүдний дотоод даралт ихсэх/ өвчин, шээс хөөх зорилгоор болон эпилепси /уналт, таталт/ -ийн үед хэрэглэдэг энэхүү эмийг эмийн сангууд жороор олгох ёстой атал ОХУ-ын “Акрихин” эмийн үйлдвэрт савласан гэсэн хаягтай, бүртгэлийн загвараас зөрүүтэйгээр зах зээлд худалдаалж байгаа аж. Улсын бүртгэлийн загвараас зөрүүтэй Диакарб эмийг танихын тулд савлагааг сайн анзаарах хэрэгтэй ба ОХУ-ын “Акрихин” үйлдвэрт үйлдвэрлэсэн гэсэн бичигтэй, хэрэглэх  арга, зааврын бичилт, үйлдвэрлэсэн огноо, цуврал, бүртгэлийн дугаар, эмийн найрлагын бичилт тодорхой байгааг анхааруулж байгаа юм.

  Манай улсад  үйлдвэрлэх, импортлох, худалдах эм, эмийн түүхий эд, биологийн идэвхт бүтээгдэхүүнийг улсын бүртгэлд бүртгүүлсэн байх ёстой байдаг. Ингэхдээ эмийн чанар аюулгүй байдлын баталгааг хангах чиглэлээр эрүүл мэндийн тусламж үйлчилгээний хэрэгцээнд нийцүүлэн эмчилгээний өндөр идэвхтэй, чанартай, аюулгүй эмийг  бүртгэдэг аж.