Ерөнхий сайд Ч.Сайханбилэгийг огцруулах бичигт 17 гишүүн гарын үсгээ зураад байна. Хуулиараа энэ гарын үсэг 19 хүрвэл УИХ-д өргөн барьж огцрох эсэхийг шийддэг зохицуулалттай. Өнгөрсөн оны 11 сард Н.Алтанхуягийн тэргүүлсэн Шинэчлэлийн Засгийн газрыг огцруулж, Ч.Сайханбилэгийн удирдсан Шийдлийн Засгийн газар томилогдсон. УИХ дахь намууд  хамтран Засгийн газар байгуулсан ч ажиллаж эхлээд ердөө 7 сарын дараа огцруулах хөдөлгөөн гарч эхэллээ.

Засгийн газрын 2012-2016 оны үйл ажиллагааны хөтөлбөрийн хэрэгжилт 2014 оны эцсийн байдлаар 46.2 хувьтай гарсан байдаг. Засгийн газар хийхээр төлөвлөсөн ажлынхаа 50 хувьд ч хүрээгүй байхад өмнөх Засгийн газар тарсан гэсэн үг. Одоо хэрвээ дахин засаг солигдвол шинэ кабинет бүрдүүлэхээр цаг алдах, 2012 онд батлагдсан Засгийн газрын  2012-2016 оны үйл ажиллагааны мөрийн хөтөлбөрийн хэрэгжилт улам удаашрах зэргээр засаглалын тогтворгүй байдал дотоод, гадаад хямралд улам сөрөг нөлөө үзүүлэх эрсдэлтэй. Огцруулах гарын үсгийг О.Баасанхүү гишүүн цуглуулж байгаа агаад одоогоор  гарын үсэг зурсан 17 гишүүний нэр тодорхой бус  байна.