АН-ын бүлэг өнөөдрийн хуралдаанаараа ерөнхий сайдын мэдээллийг сонссоны зэрэгцээ Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай УИХ-ын тогтоолын төслийг хэлэлцжээ. Мөн Тавантолгойн асуудлаар мэдээлэл хийсэн байна. 

Бүлгийн дарга Б.Гарамгайбаатар : 

Таван толгойн төсөлтэй холбоотой асуудлаар Д.Хаянхярваа гишүүн энэ төслийг МАН дэмжиж байгаа, харин АН дотроо “зодолдоод”  урагшлуулахгүй байна гэсэн мэдээлэл хийсэн байсан. АН-аас болоод Тавантолгой гацаад байгаа юм биш. Тавантолгойн ажлын хэсэгт бүх намын төлөөлөл орчихсон ажлаа хийгээд явж байгаа. Хамтарч ажиллаж л байгаа бол бүх нам энэ талаар санал, санаачилга гаргах ёстой. Түүнээс биш бүх асуудлыг АН руу чихээд байж болохгүй.

Бүлгийн дэд дарга Ш.Түвдэндорж : 

Тавантолгойн асуудлаар УИХ-ын удирдлага бүх нам анхаарлаа хандуулж, ажлаа сайжруулъя гэсэн санал гаргасан. Ажлын хэсэгт МАН-ын гишүүд орчихсон, адилхан бүрэн мэдээллээр хангагдаад хамтарч ажиллаад явж байна. Дургүйд хүчгүй, хүсээгүй зүйлээ хийдэггүй ёсоор энэ асуудалд  улстөрийн ашиг хонжоогоор  хандаад байна.