Залуу зохион бүтээгч, инженер Т.Оюунбат болон түүний байгуулсан Best Energy Saving (BES) компанийн инженерүүдийн долоон жилийн уйгагүй хөдөлмөр, оролдлогын үр дүнд бүтээсэн техник технологийн дэвшилтэт, шинэ бүтээгдэхүүн болох эрчим хүчний хэмнэлттэй цахилгаан халаагуур дотоодын зах зээлд эцсийн бүтээгдэхүүн хэлбэрээр гаргажээ. Тэд оюутан байхаасаа сансар судлалын NASA агентлагын бүтээсэн сансрын хиймэл дагуулын халаагуураас санаа авч, өргөн хэрэглээнд ашиглах боломжтой эрчим хүчний өндөр хэмнэлттэй халаагуур бүтээх зорилго тавьжээ. Улмаар урт хугацааны турш судалгаа, бүтээгдэхүүн хөгжүүлэлт, туршилт, сайжруулалтыг тасралтгүй явуулсны эцэс10 дахин бага цахилгаан эрчим хүч ашиглах халаагуурыг Монголдоо үйлдвэрлэжээ. 

Халаагуур нь +75 градус хүртэл халж, -60 градуст үл царцах шинж чанартай буюу Монгол орны цаг уурт тохирсон, нэгдсэн ухаалаг удирдлагын самбар бүхий GSM системтэй холбогдсон автомат унтраалга асаалгын тохиргоотой. Халаагуурын тохиргоог гар утсаараа алсын зайнаас удирдах боломжтойгоор үйлдвэрлэгдэж буй эко технологийг Солонгос улсын хоёр ч компани туршиж, улмаар хамтран ажиллах гэрээ байгуулах сонирхлоо илэрхийлээд байгаа юм байна. 

BES компанийн бүтээгдэхүүнүүд зуух галлагаагаар дулаанаа хангадаг айл өрх, бизнесүүдэд хямд өртгөөр дулаан нийлүүлж, Улаанбаатар хотын утааг багасгахад өндөр үр нөлөө үзүүлэх боломжтой гэдгийг зохион бүтээгчид онцолж байгаа бөгөөд хэтдээ үйлдвэрлэлээ өөрсдөө явуулах замаар экспортын зах зээлд гаргах төлөвлөгөөтэй ажиллаж эхлээд байгаа гэнэ.