Л.Гансүх нарт холбогдох шүүх хуралдаан хэлэлцүүлгийн шатанд үргэлжилж байна. Шүүх хуралд хохирогч талаас “Багануур” ХХК-ийн Санхүүгийн албаны дарга, Баянзүрх дүүргийн татварын хэлтсийн хянагч, шалгагч, Төрийн өмчит хорооны төлөөлөл оролцож байгаа юм.

Хохирогч 1 : Багануур ХК-ийн санхүүгийн албаны дарга

Шүүх хуралдааны үеэр шүүгдэгч Л.Гансүхийн өмгөөлөгч Б.Цэрэнжээ хохирогч “Багануур” ХХК-ийн Санхүүгийн албаны даргаас асуулт асууж, хариулт авсан юм. Энэ үеэр анхаарал татахуйц хэд хэдэн асуудлууд гарч ирсэн юм.  Хохирогч өмгөөлөгчийн асуултад хариулах үеэрээ “Багануур хувьцаат компанийн зүгээс АТГ-д хандаж гомдол гаргаагүй. Би ШАХАЛТАД орсон.” гэж мэдэгдсэн байна.

Өмгөөлөгч : Танайх АТГ-т хохирлоо гэж гомдол гаргасан уу? Яагаад энэ хэрэг үүсчихэв?

Багануур ХК хохирогч: Бид гомдол гаргаагүй. Шинжээч нар хохирсныг тогтоосон байсан.

Өмгөөлөгч: Нүүрс худалдах, худалдан авах гэрээнээс хохирсон хохирол байгаа юу?

Багануур ХК хохирогч : Гэрээнд заасан 3.6 дээр зааснаас бусад тохиолдолд хохирсон зүйл байхгүй.

Өмгөөлөгч: Тэгвэл 3.6 дээр шуудайлж савласан нүүрснээс үнээ төлнө гээд заасны дагуу компани мөнгөө төлөөгүй юм уу?

Багануур ХК хохирогч : Төлсөн.

Өмгөөлөгч: Тэгээд яагаад хохирсон гээд байгаа юм?

Багануур ХК хохирогч: Хариулт өгсөнгүй

Өмгөөлөгч: 27500 төгрөг та бүхний хийсэн гэрээн дээр байгаа үнэ биздээ?

Багануур ХК хохирогч : Хариулт өгсөнгүй

Өмгөөлөгч: 3.6 заалтыг хүлээн зөвшөөрч гарын үсэг зурсан компани авсан нүүрснийхээ мөнгийг төлчихөөд байхад хохирох уу?

Багануур ХК хохирогч : Нүүрсний шуудайнд савлагдсан зөрүүн дээрээс хохирсон гэж үзэж байгаа.

Өмгөөлөгч: 39000 төгрөг гэсэн нүүрсний үнийг 27500 болгосон нь нүүрс хөтөлбөрийн хүрээнд зорилусан үнэ мөн үү?

Багануур ХК хохирогч : Би үгүй л гэж бодож байна.

Өмгөөлөгч: Шуудайлсан нүүрс, танай ачсан нүүрс хоёрын дундаас 14 тонн нүүрс дутаад байна. Энэ нүүрс хаачсан бэ?

Багануур ХК хохирогч: Би тэр нүүрс хаачсаныг мэдэхгүй байна.

Өмгөөлөгч: Тэгвэл энэ мөнгийг шүүгдэгч нар төлөх ёсгүй юм биш үү?

Багануур ХК хохирогч : Хариулт өгсөнгүй.

Хохирогч 2 : Баянзүрх дүүргийн татварын хэлтсийн ажилтан

Өмгөөлөгч : Дараах үйлдэл эрүүгийн хариуцлага хүлээлгэхгүй бол нөхөн татвар төлнө гэж хуулинд заагдсан байна. Энэ ямар учиртай юм бэ?

Татварын ажилтан : Би шинжээчийн дүнгээр хохирлоо барагдуулах гэж байна. Би нэхэмжлэгчээр л оролцож байна.

Өмгөөлөгч : Татварын хуулинд зааснаар өөр хүний гаргасан дүгнэлтээр татвар авна гээд зогсож байгаа чинь зөв үү? буруу юу?

Татварын ажилтан : Би мэдэхгүй байна.  ОУ-н татварын болон нягтлан бодох бүртгэлийн хуулийн дагуу нэхэмжлэл гаргасан.

Өмгөөлөгч : Энэ компаниас хичнээн төгрөгний ямар хуулийн дагуу хэдэн төгрөг нэхээд байна ?

Татварын ажилтан : ААН-ын татвар, НӨАТ, хувь хүний орлогийн албан татвар гээд нийт 46 сая төгрөг, үүн дээр татварыг хугацаандаа төлөөгүй буюу зайлсхийсэн алданги нэмэгдээд 611,5 сая төгрөгийн торгууль нэхэж байна.

Өмгөөлөгч : Эрүүгийн гэмт хэрэгт торгууль, алданги тавих эрх хэнд байдаг юм?

Татварын ажилтан : Эрүүгийн хуулиар торгууль ногдуулж болох эсэхийг мэдэхгүй. Төлөх ёстой татварыг төлөөгүй байна гэдэг хариуцлага алдаж байгаа гэсэн үг.

Өмгөөлөгч : Эрүүгийн хариуцлага ногдуулахаас бусад тохиолдолд торгууль нэхнэ гэж заасан байдаг. Та ямар хуулийн дагуу торгууль нэхэж байна вэ?

Татварын ажилтан : Би мэдэхгүй байна.

Хохирогч 3 : Төрийн өмчийн хорооны төлөөлөгч

Төрийн өмчийн хороо эзэмшиж байсан Багануур ХК-ийн 75 хувийн хувьцаагаа “Эрдэнэс Монгол” компанид шилжүүлсэн. Гэвч өнөөдрийн шүүх хуралд хохирогч хэмээн оролцсон бөгөөд Багануур ХК-ийн нэхэмжилж буй 331 сая дээр нэмээд 63.9 сая төгрөгийг давхар нэхэмжилсэн юм. Үүнд өмгөөлөгч нар шүүмжлэлтэй хандаж асуулт асууж, хариулт авсан байна.

 Өмгөөлөгч: 2012-2013 оны зардлаас харахад ТӨХ хэдэн төгрөгөөр яаж хохироод байгаа юм бэ?

ТӨХ-ы төлөөлөгч : Хохироогүй, алдагдал гараагүй.

Өмгөөлөгч : Багануураас нэхэгдээд байгаа энэ мөнгийг хаана төлөх ёстой юм? ТӨХ Багануурын хохирлыг өмнөөс нь нэхэмжлэх эрхтэй юу?

ТӨХ-ы төлөөлөгч: Үгүй л дээ, гэхдээ манай байгууллага чиг үүргийнхээ хувьд нэхэмжлэл гаргасан.

Өмгөөлөгч : Танайх юу нэхэж байгаан. Яагаад хохирогч болсон юм?

ТӨХ-ы төлөөлөгч : Хариулт өгсөнгүй

Өмгөөлөгч : Хохирогч гэж өөрөө хэлсэн. Ямар үндэслэлээр мөнгө нэхээд, хохироод байгаа юм бэ ?

ТӨХ-ы төлөөлөгч : ТӨХ хохироогүй.

Өмгөөлөгч: Яагаад 331 саяыг танай байгууллага нэхэмжлээд байгаа юм?

Төрийн өмчийн хорооны төлөөлөгч: Шинжээч нар энэ тооцоог гаргасан учир бид нэхэмжилсэн.