Өчигдөр Нью-Йорк хотноо  Монгол-АНУ-Японы гурван талт анхдугаар уулзалт амжилттай болж өндөрлөжээ.

Уулзалтад Гадаад хэргийн сайд Л.Пүрэвсүрэн, АНУ-ын Төрийн департаментын Зүүн Ази, Номхон далайн асуудал эрхэлсэн Туслах нарийн бичгийн дарга Д.Рассел, Япон улсын Гадаад хэргийн яамны Ази, Номхон далайн газрын ерөнхий захирал Ж.Ихара нар оролцсон байна. Уулзалтын үеэр талууд олон улсын болон бүс нутгийн түвшинд гурван талт хамтын ажиллагааг хөгжүүлэх боломж, чиглэлийн талаар санал солилцжээ.

Ийнхүү Монгол-АНУ-Японы гурван талт уулзалт зохион байгуулсан нь манай улсын "гуравдагч хөрш" АНУ, Япон улстай олон улс, бүс нутгийн аюулгүй байдлыг хангах, эдийн засгийн хамтын ажиллагааг өргөжүүлэх, Ази, Номхон далайн бүсийн эдийн засгийн интеграцид оролцох, нэгдмэл сонирхол бүхий асуудлаар олон улс, бүс нутгийн түвшинд явуулах үйл ажиллагаагаа уялдуулах зэрэг харилцаа, хамтын ажиллагааны өргөн хүрээтэй асуудлаар санал солилцох байнгын механизм бүрдүүлэх эхлэлийг тавьсан чухал ач холбогдолтой үйл явдал боллоо гэж үзэж байгаа юм байна.