Улсын их хурал

Сонгуульд нэр дэвших төрийн албан хаагчдыг ирэх оноос албан ажлаас нь чөлөөлнө

М.Энхмаа news.trends.mn
2015-11-26 11:17

Өнөөдөр УИХ-ын нэгдсэн чуулганаар Х.Тэмүүжин нарын 5 гишүүний өргөн мэдүүлсэн УИХ-ын сонгуулийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийж баталлаа. Энэхүү хуулийн төсөл батлагдсанаар УИХ-ын гишүүнд нэр дэвших дараах албан тушаалтнууд сонгуулийн жилийн 1-р сарын нэгний өдрөөс өмнө төрийн албанаас болон ажил, албан тушаалаасаа чөлөөлөгдөх юм байна.

Үүнд :

- Төрийн жинхэнэ албан хаагч / төрийн захиргааны , төрийн тусгай, төрийн үйлчилгээний /

- Төрийн үйлчилгээний албаны удирдах албан тушаалтан

- Төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах албан тушаалтан

Хууль санаачлагчид дээрх өөрчлөлтийн үр дүнд УИХ-ын сонгуульд оролцогчдын эрх тэгш байдал хангагдан, эрх зүйн орчин боловсронгуй болж, хуулийн чанар сайжрахаас гадна хууль хоорондын уялдаа хангагдаж хэрэгжилтийг нэг мөр хангах нөхцөл бүрдэнэ гэж үзжээ.