Засгийн газар

Дэлхийн аялал жуулчлалын анхдугаар форумыг Улаанбаатар хотод зохион байгуулна

М.Энхмаа news.trends.mn
2016-01-20 13:07

БОНХАЖ-ын сайд Н.Батцэрэг Испанийн Вант улсын Мадрид хотноо НҮБ-ын Дэлхийн аялал жуулчлалын байгууллагын төвд ажлын айлчлал хийжээ. 

Айлчлалын үеэр Дэлхийн аялал жуулчлалын байгууллагын ерөнхий нарийн бичгийн дарга ноён Талеб Рифай:

"Монгол Улс Дэлхийн аялал жуулчлалын салбарын томоохон тоглогчийн нэг болох бүрэн боломжтой бөгөөд энэ зорилгод хүрэхэд ДАЖБ-ын зүгээс бүх талын дэмжлэг үзүүлнэ. Түүнчлэн Монгол улсын “Нүүдлийн аялал жуулчлал”-ыг CNN, National Geographic зэрэг дэлхийн томоохон хэвлэл мэдээллийн хэрэгслүүдээр дэлхийн хамгийн зорин очих үзүүштэй газар нутгийн нэг хэмээн зарлаж байгаа нь маш ирээдүйтэй аяллын төв болох боломж байгааг харуулж байна." гэжээ.

БОНХАЖ-ын сайд Н.Батцэрэгийн Дэлхийн аялал жуулчлалын байгууллагад хийсэн энэ удаагийн айлчлалаар хоёр тал дараах шийдвэрүүдийг гаргалаа :

1.  Аялал жуулчлалын тандалт, судалгааны төвийг ДАЖБ-ын тусламжтайгаар анх удаагаа байгуулахаар тохиролцов. Уг төв нь аялал жуулчлалаас байгаль орчинд нөлөөлөх нөлөөлөл, нийгэм эдийн засагт үзүүлэх нөлөөлөл, жуулчны статистик тоон мэдээлэлд дүн шинжилгээ хийх, мэдээллийн сан үүсгэх зорилготой.

2.  "Нүүдэлчдийн аялал жуулчлал" сэдэвт дэлхийн аялал жуулчлалын анхдугаар форумыг 2016 оны 10 дугаар сард Улаанбаатар хотноо зохион байгуулахаар тохиролцов. Уг форумыг зохион байгуулснаар "Нүүдэлчдийн замаар аялахуй" аяллын брэндийг хөгжүүлэн түүний манлайлагч орон байх, олон улсын зах зээл дээр өрсөлдөхүйц аяллын бүтээгдэхүүнийг хөгжүүлэх өргөн боломж бий болно. Түүнчлэн дэлхийн аялал жуулчлалын хөгжлийг Монгол Улсад хэлэлцэж байна гэсэн томоохон маркетинг нь Монгол Улсыг олон улсад хурлын өмнө болон дараа  сурталчлах өргөн бололцоог нээж байна.

3.  НҮБ-ын ДАЖБ-ын төвд Монгол Улсаас мэргэжилтнүүдийг урт хугацаанд дадлагажуулан ажиллуулах, мөн ДАЖБ-аас зохион байгуулдаг сургалтад манай мэргэжилтнүүдийг суралцуулахаар тохиролцлоо.

4.  Аялал жуулчлалын салбарын эрх зүйн орчныг сайжруулж, аялал жуулчлалыг хөгжүүлэх үндэсний хөтөлбөрийн төлөвлөгөөг боловсруулах, олон улсын төлөвлөгөөтэй уялдуулахад мэргэжил арга зүйн дэмжлэг үзүүлэхээр тогтов.

5.  Торгоны замын аялал жуулчлалын хөтөлбөрийг Монгол Улсад хэрэгжүүлэх тал дээр техникийн тусламж үзүүлэх талаар санал солилцлоо.