“Эпилепси” нь мэдрэлийн тогтолцооны хамгийн түгээмэл эмгэгийн нэг бөгөөд дэлхийн нийт хүн амын нэг хувийг эзэлдэг. Нарийвчлан хэлбэл тархины эсүүдийн хэт цэнэгжилтийн улмаас уналтын голомт үүсэж энэ нь ухаан алдах болон унаж татах хэлбэрээр илэрдэг байна.

Харин манай улсад энэ төрлийн өвчний талаар ойлголт төдийлэн байхгүйгээс үүдэн нийгэмд ийм өвчтэй хүмүүсийг гадуурхах тохиолдол нилээдгүй байдаг аж. Учир нь олонхын дунд уналт, таталт өгөх нь сэтгэцтэй холбоотой хэмээн үздэгээс гадуурхагдах, өвчнийхөө талаар мэдэхгүй, оношлуулаагүйгээс олон хүн тэр дундаа хүүхдүүд бөө болж байгааг мэргэжлийн эмч нар онцолж байна. Уг өвчнөөр бүх насныхан өвчилдөг ч наснаасаа хамаараад өвчлөлийн шалтгаан нь өөр байдаг. Тухайлбал хүүхэд төрөхөд төрөлтийн явц нь удаан үргэлжилсэн, бүтэлт өгсөн эсвэл багадаа өндөр халуурснаас болж өвчилдөг.

Харин 20-35 насанд биедээ ямар нэгэн гэмтэл бэртэл авах, зам тээврийн осолд орсны улмаас өвчилж болно. 60-аас дээш насанд бол даралт ихсэх, тархины цусан хангамжийн өөрчлөлтөөс болж уг өвчин илэрдэг байна. Манай улсад давамгайлж байгаа шалтгаан нь ослын гэмтэл. Өөрөөр хэлбэл аливаа ослоос үүдэлтэй унадаг, татдаг өвчин нэлээд хувийг нь эзэлдэг.

Гэхдээ уналт таталт өгсөн хүн бүр эпилепси өвчтэй биш учраас ямар шалтгаанаар таталттай болсноо таньж мэдэх, түүнийгээ оношлуулах шаардлагатай. Тэгээгүйн улмаас уналт, таталт өгсөн гэхээр бөө болох ёстой гээд эмчилгээг зогсоож, хүүхдийг багад нь бөө болгочихдог тохиолдол маш олон.  Нөгөөтэйгүүр  өвчилсөн хүн өөрөө “эпилепси”-г сэтгэцийн эмгэг гэж ойлгосноос болоод бусдаас нуудаг, автобус унаанд, олон нийтийн газар явахдаа, хайртай хүнийхээ, анги, хамт олныхоо дэргэд байхдаа уначих вий гэсэн байнгын айдастай байдгаас болоод сэтгэл санааны дарамтад давхар ордог байна.

Уг өвчнөөр дэлхийд 70 орчим өвчтөн байдгийн 80-85 хувь нь хөгжиж буй орнуудад байдаг бөгөөд манай орон ч үүнд багтдаг. Түүнчлэн эдгээр хүмүүс эдийн засаг, нийгэм, тусламж үйлчилгээний хомсдолтой байдалд байна гэсэн судалгааг Олон улсын эпилепситэй тэмцэх холбооноос гаргасан байдаг.

Дэлхийн эрүүл мэндийн байгууллагатай хийсэн хамтарсан судалгаагаар Улаанбаатар хотод амьдарч байгаа эпилепситэй хүмүүсийн 69.9 хувь нь хөдөлмөрийн чадвар алдалттай, 13.1 хувь нь ажил эрхэлдэггүй, ажил эрхэлж байгаа хүмүүсийн 71 хувь нь өвчнийхөө улмаас ажлын байраа өөрчилсөн, 49.1 хувь нь ядуу гэж гарсан. Энэ нь манай улсад ч гэсэн ийм хүмүүсийн нийгмийн халамж үйлчилгээ муу байгааг давхар харуулж байгаа юм. Дэлхий нийтээр “Эпилепси өвчинтэй тэмцэх өдөр” энэ сарын 26-нд тохионо.