МЭДЭГДЭЛ

 2016 оны 06 сарын 23 өдөр 

Улаанбаатар хот

Миний бие Донорoвын Гантулга нь Сонгуулийн Ерөнхий Хорооны 2016 оны 06 дугаар сарын 04-ний өдрийн 135 тоот тогтоолоор Монгол Улсын Их Хурлын 2016 оны ээлжит сонгуулийн Хан Уул дүүргийн 58 дугаар тойрогт бие даан нэр дэвшигчээр бүртгүүлж, сонгуулийн сурталчилгааны ажлаа эхлүүлээд 13 хонож байна. Би Хөдөлмөрийн Үндэсний Намын гишүүн бөгөөд тус намын Ерөнхий нарийн бичгийн даргаар ажилладаг. Манай намын анхан шатны үүрийн өдөр тутмын үйл ажиллагааг бие даан нэр дэвшигч надтай хүчлэн холбож, зохиомол хэрэг үүсгэн миний нэрийг татуулахын төлөө зохион байгуулалттайгаар ажиллаж байгааг эрс буруушааж байна. Хан-Уул дүүргийн Яармагийн Цагдаагийн 2-р хэлтсийн цагдаа, мөрдөн байцаагчид шүүх, прокурорын тогтоол шийдвэргүйгээр иргэдийг гэрээс нь баривчилж Цагдаагийн хэлтэс дээр авчран гэрчийн мэдүүлэг авч хуулийг ноцтойгоор зөрчжээ. Жишээ нь, машин дотор нууцаар, хууль бусаар, үндэслэлгүй бичлэг хийх замаар бий болгосон баримтыг шүүхэд хүргүүлснийг Хан Уул дүүргийн анхан шатны шүүгч Батболор гэгч нотлох үндэслэлд тооцож намайг захиргааны зөрчил гаргасан гэж үзсэн байна. Энэ гүтгэлэг, зохиомол дайралтыг огтхон ч хүлээн зөвшөөрөхгүй тул би Нийслэлийн эрүүгийн хэргийн шүүхэд даван заалдсан. Гэтэл Нийслэлийн эрүүгийн хэргийн шүүхээс Захиргааны Хэргийг Шүүхэд Хянан Шийдвэрлэх Тухай хуулийн 117.1 дүгээр заалт буюу “Давж заалдах шатны шүүх хэргийн оролцогч, тэдгээрийн төлөөлөгч, өмгөөлөгчид давж заалдах шатны шүүх хуралдаан хэзээ, хаана болохыг мэдэгдэж, тэдгээрийн шүүх хуралдаанд оролцох эрхийг хангах үүрэгтэй” гэж заасныг ноцтой зөрчлөө. 2016.06.21-ний орой ажлын бус цагаар 18 цаг 46 минутад мессаж бичиж орхиод маргааш нь буюу 2016.06.22-ний өдрийн өглөө 08:30-д намайг болон миний өмгөөлөгчийг шүүх хуралд биечлэн оролцуулалгүйгээр, Монгол улсын хуулийг уландаа гишгэн, шүүх хурлыг хуралдуулж анхан шатны шүүхийн шийдвэрийг хэвээр баталсан гэх мэдээлэл аваад байна. Энэхүү эрээ цээргүй, увайгүй, төрийн эрх мэдэлд хүрэхийн тулд юу ч хийхэд бэлэн улайран зүтгэж байгаа үйлдлийг бодитоор нийт Монголчууддаа, ялангуяа Нисэх, Өлзийт хорооны сонгогчдод хүргэхээр энэхүү хэвлэлийн бага хурлыг зохион байгуулж байна. Сонгогчдын итгэлийг хүлээж, санал авч сонгогдож чадахгүйгээ мэдсэн, мэдэрсэн хэн нэгэн Монгол улсын шүүх цагдааг ашиглан өрсөлдөгчөө дарахаар энэ ажлыг зохион байгуулж байгаа нь, нөгөө талаас хэсэг бүлэг хүний амиа бодсон, арчаагүй үйлдлийг өмгөөлөн хувийн компанийн ажилчид шиг ажиллаж байгаа Хан Уул дүүргийн шүүх, цагдаа нэн хөөрхийлөлтөй, ашиг сонирхлын асар их зөрчилтэй харагдаж байна. Сонгуулиар амьдрал дуусахгүй … ард олон юу болоод байгааг мэдэхийн дээдээр мэдсэн. Бусад нэр дэвшигчдэд хандаж хэлэхэд та бүхэн эх орныхоо ирээдүйг бодоод сонгуульд шударгаар өрсөлдөөч гэж уриалмаар байна. Эцэст нь хэлэхэд ШИНЭ ИДЭР ҮЕ ИРСЭН. Нийгмийн захиалгат энэ хөдөлгөөнийг хэн ч зогсоож чадахгүй, дийлэхгүй. Бид Монголын төрд нүүрлэсэн энэ аалзны тор, танил талын хүрээлэл, ашиг сонирхлын зөрчил, шударга бус цагдаа шүүхийг зүйд нь оруулж, ЗӨВ болгохын тулд БИД ТЭМЦЭНЭ.

УИХ-ын сонгуулийн 58-р тойрогт бие даан нэр дэвшигч Доноровын Гантулга